 | Вуж гзаф рахазватIа, гьада тIимил лугьузва
*****
Дуьньядихъ са хъсанвал ава – ам вахтуналди я. Дуьньядихъ са писвални ава – гьамни ам вахтуналди хьун я
*****
Гьар са дишегьли гьелелиг секинзавай Везувий я
*****
Кесибвилерикай виридакай анжах руьгьдин кесибвал айибвал я
*****
Ирид лагьай сеферда кунихъай виридалай ругудра кайидаз кичIе я
*****
Чилин шардихъ шал гала
*****
Дустарни тараллай ичер хьиз я – гьикьван гзаф хьайитIа, гьакьван куьлуьни жеда
*****
Тек асади, вич патахъди ятIани, Дуьз хъийизва патахъбур
*****
Санани садрани гужлубур Хьайид туш садазни буржлубур
*****
Вуна заз вич патал чанни гуз гьайиф тушир затI багъиша, за ваз дуьньядал виридалай гуьрчег кьиникь багъишда
*****
Гатфарикай виридалай таъсирлу шиир зулу кхьизва
*****
Зи вири суварар зун и дуьньядал атай юкъуз куьтягь хьана
*****
Низ хьайитIани ачухиз, зи рикI ашер папан дакIар туш
*****
Бахтунин тахтунал анжах вахтуналди ацукьиз жеда
*****
Пачагьдин мукьвадини, вахт атайла, Аллагьдиз мукьва жеда
*****
(этюд)
Кьуьд.
Сурухъ галай вили къван, Налугьуди вили хьанва мекьила…
*****
Низ кIанзава – ам зурба я, Вуж кIанзава – ам тек туш
*****
Эрекь ширин хьайидан кьисмет туькьуьлди жеда
*****
Бахтунив ви адрес гвачир хьтинди я, Майрудин…
*****
Дуьз хьелни, анжах патахъ чIемерук галайла, яракь я
****
ГъвечIи гагьда жезвай чIехи кIвалах анжах сад я – кьиникь
*****
Хъсан фикирарни, чинебан ашнаяр хьиз, йифериз къведа
*****
Политикадиз вири захутIрай физвай хьтинди я – виридахъай ни къвезва
*****
Бахтни ахвар хьиз я – гъвечIи чIавуз чIехи жеда, чIехи чIавуз – гъвечIи
*****
Зи ктабринни аярин арада авай тафават анжах сад я – аялриз тIварар за дуьньядиз атайдалай кьулухъ гана, ктабриз – дуьньядиз къведалди
*****
Итимриз къуллугъар кьван дишегьлиярни кIан хьанайтIа, ракьукай авунвай Эйфелан минардини цуьк ахъайдай
*****
Чун вири къекъверагар я – чун вири бахтунихъ къекъвезва
*****
Гьар са кицIиз гьар са шалман вичиз цвар ягъиз акIурнавайди хьиз я
*****
Мумкинвални, кьуьзуь хьана рекьидай, Аламат я, кьиле ацахь тийидай: Тек са рекьяй къвезва чун и дуьньядиз, Агъзур рекьер ава инай хъфидай.
*****
Гъилер азад хьайила, чун инсанриз элкъвена, руьгь азад хьайила, чун аллагьриз элкъведа
*****
Дишегьлиярни цуьквер сад хьиз гуьзелзава. Амма цуьквер дишегьлийрилай хъсан я – абур рахадач
*****
Тахтунал ацукьун хъалчахриз къулай я, кьилиз – хаталу
*****
Кимелай, кьуьзуьбур атайла, жегьилар хъфида, уьмуьрдай, жегьилар атайла, - кьуьзуьбур
*****
Лезги литературадин паруяр ацахьнавай хьтинди я – ана гзаф данаяр аваз аквада…
*****
Виридалай гуьрчег шикил: сирендин цуьк – тарал, виридалай эйбежер шикил: сирендин цуьк – гъиле
*****
Инсаниятдин кьисмет чIехи женгер физвай майданрални чIехи ахтармишунар тухузвай лабораторийра ваъ, гъвечIи памбагдин месерик гьял жезва
*****
ЦIайлапандикай дуст кьурди сифте цIу куда, ахпа марфади кьежирда; дишегьлидикай дуст кьурди сифте накъвари кьежирда, ахпа дердери куда
*****
Дуьньядихъ кьве жуьре халис душманар ава: гъуьлуьз тухун тавур папарни машгьур тахьай шаирар
*****
Са дишегьлиди чун хазва, маса дишегьлиди – рекьизва
*****
Бубадин душманар яргъалди яшамиш жеда
*****
Т1алсуз уьмуьрдиз къвез жезвач, тIалсуз – хъфизни. Амма виридалай чIехи тIал … уьмуьр вич я
*****
Чун садра хазва, садра яшамиш жезва, садра рекьизва. Амай вири кIвалахриз тикрар хьун хас я
*****
Пулуник квай нукьсан сад я – адахъ гьамиша иеси ава
*****
Чехирдихъни уьмуьрдихъ са уртахвал ава – чаз абур кьенятиз чизвач
*****
Шииррални, муьгьуьббатдал хьиз, хелветдиз машхул хьана кIанда
*****
Акьул пулунихъ къачуз жедач. Акьуллуяр – жеда.
*****
Москвадиз, гъалибвилин парадда иштаракиз, кьве агъзур ветеранни са агъзур аса атанва.
*****
Такабурлувал квадаррай шаир яд фейи ракь хьиз я – акатайда патахъарда
*****
Къадагъалу ич тIуьрдалай кьулухъ Гьавадин рушвал квахьна, дуьньядин - кьарай
*****
2000 – йисан мартдиз Путинакай Урусатдин пачагь хьана, закай – гатфарин лукI
*****
Эвел регъуьвал квахьда, ахпа шалвар
*****
Къвез-къвез дишегьлийрин перемар куьруь жезва, мецер – яргъи
*****
Пул гьамиша ам авачирбуру негьзава
*****
Сифте за эрекь авай птулкадин кьил алудна, ахпа эрекь авай птулкади – зи кьил
*****
Яргъалди анжах яхун гьерер амукьда
*****
Гатфарик са нукьсан ква – ам фад куьтягь жеда
*****
КIула пар авайдаз хур экъисиз четин я
*****
Ахмакьвилиз тфу гумир – ахмакьвал гзафбуру яд хъвазвай булах я
*****
Чинардинни анардин тарари гьуьжетналди, я анардин тар кьакьан жедач, я чинардин тарци анарар гъидач.
*****
Са карда чун верчериз ухшар я: верчериз чпи экъягъай цицIибри са кIуьд вацралай кIеквал ийизва, чаз – чна хкягъай гьакимри…
*****
Дишегьлияр чи кьвед лагьай пай ятIа, ам чи хъсан пай я
*****
Дишегьлийрик нукьсанар гзаф ква, амма абурун лайихлувилерин кьадар мадни артух я
*****
ЦIай чилел жеда, гум – цава
*****
Дуьньяда кIанивал амай кьван такIанвални амукьда. К1анивал даим я
*****
Са гъвечIи шиир туькIуьрайла, заз икьван шад жезвай, и гуьзел дуьнья туькIуьрайдаз яраб гьикьван шад хьанатIа? Нагагь Аллагь авачтIа, дуьньяда виридалай зурба шадвални авач…
*****
Яшар пулунилай са карда тафаватлу я: пул гьикьван гзаф хьайитIа, гьакьван чаз шад жезва, яшар гьикьван гзаф хьайитIа, гьакьван – пашман
*****
Политик хьун патал анжах са шартI герек я – табдайла яру тахьун
*****
Бармакри чеб алукIдай кьилер чпи хкядайт1а, белки зазни абур са шумуд жедай
*****
Вирибуруз кагьул кас яз чида зун, Лянет гузва зи уьмуьрдин еришдиз. Эй, ахмакьар, тади кваз куьз фида зун Азраилдихъ галаз къара гуьруьшдиз…
*****
Вине авай кьил ягъиз тади ийида, агъада авай кьилелай кап алтадиз
*****
Инсанри, чими хьайила, перемар хтIунда, тарари – мекьи хьайила
*****
Дагъвияр Алагьдинни инсанрин арада яшамиш жезва
*****
Америкада билбилар авач
*****
ЧIехи дапIарни гъвечIи куьлегдал ахъайда
*****
Сифте къвайи живедини сифте гайи бахтуни инсан буьркьуь ийида
*****
Фитнедини, цIай кьур кIарасди хьиз, сифте куда, ахпа чIулаварда
*****
Инсандин виридалай чIехи чирвал вич са мус ятIани рекьидайди чир хьун я
*****
Вац1ариз, кьил дагъда аватIани, гьуьл арандай жагъида
*****
Зун бахтлу хьун патал кIаниди са шартI я – вун бахтсуз тахьун
*****
Дишегьли гагь чуплах бахт я, гагь перемар алай бахтсузвал
*****
Виридалай гуьрчег цуьквер рекьин къерехра жеда, чебни руг алаз
*****
Мугьмандихъай кичIе хьун душмандихъай кичIе хьунилайни агъуз кар я
*****
Сулейман бубадин парталар куьгьнебур тиртIани, фикирар цIийибур тир
*****
Бахтсузвал садра къведа, иридра хъфида
*****
Виляй аватдалди тарай аватунни хъсан я
*****
Бахт вахт авачир мугьман я
*****
Инсандал са тIварни са чин хьана к1анда
*****
Садрани са касдизни икрам ийимир – ада ви агъузнавай кьамал кьацIурун мумкин я
*****
Китайдин цал кьван кьакьан имарат китайвияр кьван аск1ан инсанри эцигун аламатдин кар туш
*****
Хвейи гаф хвейи къизилдилайни багьа я
*****
Гьахъни пул хьтин затI я – хирде ийиз жеда
*****
Шив физвай кьван чкайриз ламран хияларни физвач
*****
Вири гьакьван дуьз къалурзавай гуьзгуьдинни са пад лацуди ятIа, муькуь пад – чIулавзава
*****
Дуьньяда виридалай хуш аслувал дишегьлидилай аслувал я
*****
Дишегьлиярни гъетер хьиз я – чна абурухъ дат1ана ялзава, агакьайла - абуру чун кузва *****
ЭкIядай чка авайтIа, дишегьлийри дуьньяни чуьхуьдай
*****
Дишегьлийриз киферни йифер яргъибур кIанда
*****
Садан диде – садра аллагь, Вадан диде – вадра аллагь…
*****
Къе дишегьлидал хъуьрезвайди пака вичихъ шехьда
*****
Икрам цавуз ийизватIани, пел чиле эцязава
*****
Вуна заз къе вуж бахтлу ятIа къалура, за ваз пака вуж бахтсуз жедатIа къалурда
*****
Эгер ваз жувалай гзаф са кас кьванни кIанзавачт1а, ваз жувни са акьван кIанзавач
*****
Ризкьи галачиз зун яшамиш жедач, поэзия галачиз заз яшамиш жез кIанзавач
*****
Ви дишегьли вуж ятIа лагь, за ви эхир гьихьтинди жедатIа лугьуда
*****
Дишегьлидиз гатфар гатфар я лугьуз ваъ, вичин цуьквер алай перемдиз ухшар я лугьуз кIанзава
*****
Дуьнья, итим хьиз, хъуьрезва, дишегьли хьиз, шехьзава
*****
Вири дявеяр политикри гатIунзава, вири къалар – папари. Вири политикар папариз ухшар я
*****
Дишегьли гьамиша хъфизвай бахт я, гьамиша къвезвай бахтсузвал
*****
Ичкидилай кьулухъ кьил са юкъуз тIа жеда, дишегьлидилай кьулухъ – амай вири уьмуьрда
*****
Чна вирида бахтунихъ галтугзава, бахтсузвили – чахъ
*****
Жуван аялар вири инсанриз кIан жеда, чарадан аялар – халис инсанриз
*****
Виридан мурадар цавар я – Виридан кьисметар накьвар я…
****
Гьич лугьумир: «Мад хъваз жезмач, пиян я», Хъивегь жуваз цайиди: Инсан патал тек са чехир зиян я – Душман галаз хъвайиди
*****
Шаирвал квасавал туш, Шаирвал исавал я…
*****
(Эпитафия)
Ам атана дуьньядиз, Ада дуьнья дегишарнач. Адан гьунар ам я хьи, Дегиш хьанач ам вични…
*****
Кефер чIугу, ягъиз югъди тIирипIар, Вакай садра дишидаз хъел къведалди: Заз акуна, виш душман хьуй итимар, Тек са душман шал галайди жедалди
*****
Зи биришар ви туьгьметрин гьунар я, За – ви чIарар гимишарна, кваз такьаз: Заз чидайди, чи кIанивал санбар я, Кьуьзуь авун гьалалнатIа сад садаз.
*****
Кьил акъатнач зи инсанрин крарай – Гагь малаик, гагь инсафсуз жаллатI я, Гагь чиликай фида, гагьни – цаварай: Инсан, заз чиз, тIебиатдин гъалатI я…
*****
Виридалай пис азар тир зибилдихъни са хъсанвал ава: ам садакай масадак акатдач
*****
Чи поэзия кимин кIарасдиз ухшар хьанва: акатайда къвез адал вичин яцIу якIар эцигзава
*****
Ленинан идеяйрилай адан мейит яргъалди амукьна
*****
Тариф ичкидилай хъсан затI я – ичкиди хьиз, кьилни элкъуьрзава, пахмелни жезвач
*****
Виридалай залан къван жувал алукьайди я, виридалай залан тIал – жувахъ галукьайди
*****
Намуслу Урусат кьепIерани сурара ава
*****
Гьар хъвазвайда ички кьван вичин ивини хъвазва
*****
Инсандин жегьилвални диде кьейи юкъуз рекьизва
*****
Звезды не брезгуют отразиться даже в грязных лужах
*****
ЧIурукIа рахазвайди мез ятIани, гъуд галукьзавайди к1уф я
*****
Къенин уьмуьрда зун шадарзавайди са кар я – кьалу ятар авай хулариз зи кьилелай кIвачер гзаф аватзава
*****
Ахмакьвилин вацIалай анжах акьулдин луьткведа аваз элясиз жеда
*****
Жуван халис дуст заз анжах гуьзгуьдай килигайла аквазва. Халис душманни
*****
Чулав сура чун лацу кафандик кваз твазва
*****
Фитнеди чарадан кIвал чIурда, жуван - рикI
*****
Индияда веледри диде-бубаяр кьейила кузва, чина – чан аламаз
*****
Ватан кIан хьун вири кIанивилерин нетижа я
*****
Зи бахтлувал – дуьньядал са дертни жув себеб яз арадал татун я, бахтсузвал – дуьньядал са дердинизни жувавай дава тахьун
*****
Зигьин анжах са карда зиянлу я – гьуьрмет ийидайла
*****
Девлет тIал я, амма ширин тIал
*****
Вири итимар акьуллу папарихъ къекъвезва, вирида гуьрчегбур гъизва…
*****
ЧIагъанди акъажайла ван ийида, хъипре – чуькьвейла
*****
Инсанни хали сад я – къене патай ктIида
*****
Чигедиз няни садрани аквадач
*****
Кьеб кьисмет хьайидаз сурни кьисмет жеда
*****
Аялрин перемар гзаф кьацIуда, чIехибурун – намус
*****
Инсанарни вацIар хьиз хьанва – анжах агъадалди физва…
*****
Инсан гзаф хъуьрезватIа, инсандиз гзаф писзава…
*****
Ивидин ни галай патахъ алад – ваз инсан жагъида
*****
Бахт хиве кьурдини, бахтсузвал хиве кьурдин Аллагьди дишегьлидин патав ракъурзава
*****
Жува жувахъ галаз тухузвай женгина бронежилетар алукIиз жедач
*****
Урусатдиз къвез жеда – Урусатдай хъфиз жедач
*****
Инсанни хъенч1ин гичин хьиз я: гьикьван гзаф кайитIа, гьакьван лигим жеда
*****
Инсандик гьикьван аялвал куматIа, гьакьван инсанвални кума
*****
КIвачер муркIадилай цIуьдгъуьнда, кьил – тарифдилай
*****
Дустагъда гьат тавуна, тарихда гьатайбурун кьадар лап тIимил я
*****
Уьмуьр аламатдин затI я: 70 йисан къене гьамиша ваз кIандайвал жезва, эхирдай са сеферда – чилик квай шарариз
*****
Шалмандиз вичелай гьи патахъай элясайтIани къайгъу туш
*****
Къе виридалай къачуз регьятбур къенин дарманарни журналистар я
*****
Цаву вичиз икрамзавайбур саймишни ийизвач, чили вичиз икрамзавайбур хуьзва
*****
За анжах са чIавуз жувахъ вилер хьунал пашманвалзава – тIазвай аялар акурла…
*****
За садрани рикIелай ракъурзавач – инсандин мецикни, гъуьлягъдик хьиз, кIарабар квач
*****
Инсанар, чпин кьилин кеспийрилай алава яз, вири хъсан пожарникарни я: абуру кузвай рикIер гьасятда туьхуьрда…
*****
Вири жаллатIриз куьз ятIани бубуяр гзаф кIанда…
*****
Инсанарни цифраяр хьиз я: абурун чIехивал-гъвечIивал кьулухъ галай нулрин кьадардилай аслу я
*****
Зун азад я, куьз лагьайтIа гзафбурулай аслу я
*****
Гъуьлягъди хам гьар йисуз дегишарда, хесетар – садрани
*****
Гьар са кас хун – хатадай я, гьар са кас кьин – къанун
*****
Дуьньядал виридалай яргъи мах дин я
*****
Туфлидин кIуф садра ахъа хьанмазди, чна ам гадарзава. Бес инсанар?…
*****
Гьахъвал гагь гуьлягъдин зегьерлу сухва ава, гагь къизилгуьлдин назик пешина…
*****
Хци хьун хъсан я, амма жувалди, делекдал хьиз, чарабурун чуруяр тваз туна кIандач
*****
Этим Эминанни чи арада вуч тафават аватIа, чидани ваз, Шагьабудин? Чна пIапIрусар чIугвазва, Эмина халкьдин дерт чIугунай, дуст…
*****
Вири къизилгуьллер алай валарал цацар ала, амма вири цацар алай валарал къизилгуьллерни алач
*****
-Дагъви дишегьлияр арандинбурулай квелди тафаватлу ятIа, чидани ваз?
-Чида: арандин дишегьлийри аранда лагълагъарзава, дагъви дишегьлийри – дагълара
*****
БалкIан гьалай патахъ фида, инсан – къулай патахъ
*****
Дагъви дишегьлийрихъ кифер амач. Дагъви дишегьлийриз гила кефер хьанва
*****
Чи бубайрин девирда дагъвидин гаф гьулдандилайни кIеви тир, гила, алюминий хьиз, хъуьтуьл хьанва. Шадарзавайди са кар я: гьамни ракь я
*****
Къавкъазда яргъи ихтилатарни куьруь дявеяр жедайди туш
*****
Гьамиша зун дустарихъ галаз физва, садра зун дустари тухуда
*****
Фазу Алиевадин гунг Дагъустанда виридалай кьакьан кукIуш туш
*****
Жуван нефс муьтIуьгъариз хьайидавай дуьньяни муьтIуьгъариз жеда. Амма нефс авачирдан дуьнья квез я кьван?
*****
Хуьруьн фекьи тирдал паклу, Адан паб туш кIусни шаклу…
*****
Тарар даим кIвачелла, Налугьуди датIана Абурун гимн язава…
*****
Дишегьлидикни гьуьлуьн тIул ква - секиндайлани, лепе алайлани хаталу я
*****
Чилин рекьерай фена, гъетерал агакьдач
*****
Дуьньядал виридалай чIехи кук1уш зи намус я. Адал гьеле альпинистар акьахнавач
*****
Намусни, перемар хьиз, чуьхуьдай мумкинвал авайтIа, дуьньядал виридалай кьит затI запун жедай
*****
Игитдин кIвач гьамиша уьзенгдал ала, кьил – сурал
*****
Ажузди гьакимрин буба жеда, игит – етимрин
*****
Игитдин тIвар хцел жеда, Ажуздан тIвар – вичел…
*****
Игитди суруз чIулав чIарарни лацу сарар тухуда
*****
Складчидиз кIвализдалай дустагъдиз мукьвал я
*****
Виридалай важиблу тум турунинди я
*****
Хъел виридаз къведа, гьалализ виридавай жедач
*****
Ажуздаз девлет жеда, игитдиз – гуьмбет
*****
Паклу инсанар анжах паклу ктабра ава
*****
Къунши маса къачуз жедач, маса гуз – жеда
*****
Гатуз чилиз икрам тавурда хъуьтIуьз къуншидиз икрамда
*****
ЧIехи везир, са шумудра пачагьдилай акьуллу тир, амма вич са шумудра адалай ахмакь яз къалуриз алакьдай касдикай жеда
*****
Вуч япариз хуш ятIа, гьам гьамиша кьилиз менфятлуни туш
*****
Ахмакьдив гвай карч сифте чехирдай ацIуда, ахпа – накъварай
*****
Уьмуьрдайни, хабарсуз гъуьл хтай ашнадин дакIардай хьиз, хъфена кIанда: вири туна ва артух ван-сес тавуна
*****
Ахмакьвал ахмакьдин пачагь я, акьул – акьуллудан лукI
*****
Нагагь чпихъ тIимил кьванни акьул авайтIа, вири дишегьлияр базаррал жедай – ам гуьрчегвилихъ дегишариз
*****
Дишегьлидиз итимдикай кьведра халис хъел къвезва: жегьил чIавуз – вичин цIалцIамвал аквазвач лугьуз, кьуьзуь хьайила – вичин биришар аквазва лугьуз
*****
Инсанри инсанрилай маймунриз гьурметзава – абуру маймунрин як недач
*****
Экуь ракъинизни анжах мичIи гуьзгуьдай килигиз жеда
*****
Ахмакьдикай дуст кьурдаз дердиникай стха жеда
*****
Кьве гьалда авайла вири инсанар хъсанбур я – ксайлани кьейила
*****
Къазанжияр фад къведайбур хъсан я, мугьманар – фад хъфидайбур
*****
Эхь, дишегьлияр авачиртIа, дуьньяда фитнени жедачир. Дишегьлияр авачиртIа, дуьньяда са затIни жедачир
*****
ЦIийи жуьредин перемарни куьгьне жуьреда хтIунда
*****
Итимдал кьве паб хьана лугьудай тIвар жедалди, кьве дерин хер хьайитIа, хъсан я
*****
-Адамни Гьава женнетдай вуч себеб яз чукурнай, фекьи халу? -Муьгьуьббат, чан хва. -Муьгьуьббат авачтIа, ам вуч женнет я кьван?…
*****
Кьакьан раг кьацIурдай тIенкьерай Ихтияр ава тек лекьериз…
*****
Къуй чун садрани цIун винелни тахьуй, цин кIанени
*****
Вуж хъуьрезватIа, ам бахтлу я, нел хъуьрезватIа, ам – бахтсуз
*****
Инсан муьтIуьгъариз кIанзавайди ахмакь я, инсаният муьтIуьгъариз кIанзавайди – вад миллиард сеферда ахмакь
*****
Тарих виридуьньядин къагьбе я. Амма вичив гьар сеферда, гунагьсуз рушав хьиз, гатIунна кIанзавай къагьбе
*****
Садра кьванни дяве акурдаз инсанар ахкваз артух кIан хъижедач
*****
Гьамбалдихъни велосипеддихъ са уртахвал ава: абур кьведни инсанди гьалзава, вични - к1вачералди
*****
Халис итимдиз дуьньяда кьуд ваъ, вад пад ава: Кефер, Кьибле, Шаркь, Хуш ва дишегьли галай пад…
*****
Эвленмиш жедайла, итимди папавай анжах фамилия дегишарун тIалабда, папа итимдивай – вири дуьнья дегишарун
*****
Цавар ацIай марфарни стIал-стIал къвана куьтягь жеда
*****
ГъвечIи аялри ксуз тадач, чIехи аялри – яшамиш жез
*****
Эгер вуна дишегьли кIвачерик вегьенатIа, жув къуьнерал хкаждайбурухъ къекъуьгъ
*****
Дишегьлийриз пулни сир хуьз чидач
*****
Рекьерни, манияр хьиз, анжах хъсанбур тикрариз кIан жеда
*****
Чун дуьньядал кIан жез къвезва, такIанвиляй ацIана хъфизва
*****
Нагагь чна уьмуьрда ийизвай кьван ахмакьвилер санал кIватIайтIа, чаз мукьварал къециз экъечIдай чкани амукьдач
*****
Чил кIвачелачирда гьиссда, илаки цаз акьахайла хцидаказ…
*****
Куьтенди, вич патахъди ятIани, хвалар дуьзбур ийида
*****
КIурни рухуниз гуда, гатанни рух хъийида
*****
Зун гьар экуьнахъ инсаният кIани кас яз къарагъзава, гьар нянихъ ам негьзавайди яз къаткизва
*****
Агъзур касдихъ акъваз тийиз шехьдалди, са шехьзавайдан накъвар акъвазарун агъзурра хъсан я
***** Заз масабурун нукьсанрал тухдалди хъуьредай ихтияр ава, вучиз лагьайтIа зун жуван нукьсанри тухдалди ширнава
*****
Зи патав вун вуч гвайди я датIана, РикI гьакьван чIулав? Менделеян таблицада тахьана, Мишьякдин къвалав…
*****
Аллагь гунагькарри арадал гъана: Аллагьди гунагьар гьалалда, инсанри – ваъ
*****
Са гьина ятIани гум аватIа, са гьина ятIани цIайни ава
*****
Чакайни гьелелиг садани Къачунвач бахтуниз билетар…
*****
Дуьз рекьяйни физвай патахъ Гъуьлягъдивай жагъидач гьахъ…
*****
Гарни хажалат кIани патахъай къведа
*****
Аял къвезва – акъваз кIвачел къарагъна: Гьар са бицIек ишигъ гузвай са рагъ я! Гьи инсандиз аялдин ял туштIа хуш, Гьам дуьньядал виридалай начагъ я…
*****
Цавар гьикьван ятIа кьакьан, Шалбуз дагъдиз чизва хъсан…
*****
Вири кьейибур кьенвач, Вири чанлуйрал чан алач…
*****
ЦIай сада кутада, къада хкадарда
*****
Инсан гьакI я – вичин вири уьмуьрда Сенят жедай дуьз кIарасдихъ къекъведа. Амма ахпа, вахт фейила, эхирдай Са кьил какур асадал ам хуькведа
*****
Виридалай чIуру кIвалах Са кар хивез къачун я. -Гьадалай вуч чIуру я, лагь? -Хиве кьур кар тавун я.
*****
Гъуьлягъни акъажайла дуьз жеда
*****
Азадвал эхирдалди садавайни чуплахриз тахьанвай ханум я
*****
Спичкадин кьватида 75 Прометей ава
*****
Гьикьван цавай аватайтIани, суралай агъуз аватдач
*****
Зун Аллагь авайдахъ агъазвач, куьз лагьайтIа заз лукI жез кIанзавач
*****
Далдамар сагъдиз амукьна виридалай цIегьериз кIанзава
*****
Сарар амачирдаз хуьрекди дад гудач, паб амачирдаз – уьмуьрди
*****
Дишегьли ксанвайла, шейтIанни ксанва
*****
ВацIу гьуьлухъ ялда, папа – кIвалихъ
*****
Инсан беябурун патал анжах са кар бес я – садаз кьванни ам беябуриз кIан хьун
*****
Гзафбурун кIанивилелай тIимилбурун такIанвални хъсан я
*****
КIвачер тIазватIа, кьилин силис твах
*****
Писвилихъ физвай рекье къир ава…
*****
БалкIандихъ сейранра къекъуьгъ, ламрахъ – къалгъанра
*****
Дустар птулкаяр ичIи ийидайла рикIел къведа, душманар – патрумар ацIурдайла
*****
-Жуван кьилеллай бармакдихъай кьванни регъуь хьухь! -Зи кьилеллайди бармак туш, фес я…
*****
Игит жез кIанибурун кьадар гьамиша игитрин кьадардилай артух я
*****
Дуьньядал виридалай яргъи рехъ гьуьрметдал физвай рехъ я
*****
Пехъеризни къведайтIа ни, Кьейи затIар недайтIа ни?…
*****
Инсан дуьньядиз беден кьацIана къвезва, чуьхвена, михьи яз хъфизва; намус лагьайтIа, михьи яз къвезва - кьацIана хъфизва
*****
Хъсан мугьман ракIарай атана, рикIяй хъфида
*****
ЦIу кайиди гаруни тухуда
*****
ТIални, ирандиде хьиз, къвез-хъфида…
*****
Ракъиниз далу пад авач
*****
Чун йифиз инсанар я, юкъуз – артистар
***** Ирандидени бармак сад я – кьведазни кьилел акьахунилай кIани кар авач *****
Чаз дишегьлияр гзаф кIанзава, вучиз лагьайтIа чаз абурухъай гзаф кичIезва
*****
ГалкIизвайди кIвач ятIани, гьалч жезвайди кьил я
*****
Уьмуьрди инсандал тIвар эцигда, кьиникьи – къванцел
*****
Инсанди, вич хайила, Ийиз жеда гьараяр! Вахт атана, кьейила, Багъри накъвар пара я. Чи уьмуьр, акI хьайила, И кьве шелдин ара я?…
*****
Яд гьамиша регьят патахъ фида, лезги – четин патахъ
*****
Хирер садбурун хурарал жеда, гъетер – масабурун
*****
Кьакьан дагъдиз фидай рекьер тIимил ава, жигъирар гзаф
*****
Писвални инсандин кIвачералди къекъвезва
*****
Ахмакьвал, чилел алатIани, цавай рахада
*****
Тур, гьикьван ислемишайтIа, гьакьван къуьруь жеда, писвал – хци
*****
Суалдин лишанди, вич патахъди ятIани, жавабар дуьзбур истемишда
*****
Шиирарни, аялар хьиз, кхьиз регьят хьанва, акъудиз – четин
*****
КапIунал физвайдани, къандай хуьквезвайдани гъилер са булахдал чуьхуьда
*****
Кун тийизвайди туьхуьризни жедач
*****
Кьейила, фитнейрин ванер техкъвезмайла, инсандин япара памбагар твада…
*****
Беден руьгьдин дустагъ я
*****
Цава авай лекьни чилик квай кьифер нез чIехи хьана
*****
Гьар са муьгьуьббат са мусибат я
*****
Уьмуьр жуван кIвачералди къекъведа, кьиникь – масабурун
*****
Пириман маркуни цIай кьуна лугьуз, Прометей тахсиркар яни?
***** Лам кьейидазни гъам жеда
*****
(зарафат)
Гьайиф вун суьннетай хванахвадиз гайи савкьатар…
*****
Гьардаз бахт вичивай яз аквада, бахтсузвал – масадавай
***** Виридаз кIан жез зун пул туш
*****
Жив кIаникай цIраз гатIунда, мурк – винелай
*****
Гьар са ламран иесидин мурад балкIан къачун я
****
Яшдилай аш хъсан я
*****
Инсан кьин патал сифте ам хана кIанда
*****
Пабни чехир дуьз хкягъиз чир хьайидан уьмуьр бахтлуди жеда
*****
Девлет нез хьайи кас авач, девлетди тIуьрбур – гзаф
*****
АватIани кьве сарарин арада, Бязибурун мез чIурук1а рахада
*****
Бубадин кьил твадалди хура, Тун хъсан я жуван кьил сура
*****
Аллагьди аялар арадал гъизва, муаллимди – инсанар
*****
Зи рушар – зи Нобелевский премияр
*****
Чехирди руьгь хкажда, кьил агъузарда
*****
Зун атай асир хъфизва, Зун хъфидай асир къвезва…
*****
Акьван хата кIвалах туш Ламран кIулай аватун. Хаталу я, - Ламралай Аватна, - тIвар акъатун
*****
Ваъ, аквазвач лагьана, Тахьурай гьа вуна шак гъиз, КIанивал зи рикIева, Батарейдин къене ток хьиз…
*****
(Сурун къванцел)
Чилел демер къурмишзама гарари, Ян хгузмач абурал ви чIарари…
*****
Лувар хьана, фейитIани цавалай, Садни фидач яргъаз вичин суралай
*****
За шиирар кхьизва – За зи кьиникь рекьизва
*****
Инсаният муьгьуьббатдин Памятник я аламатдин
*****
Рагъ вичи вич кузвай курд я…
*****
Виридалай ужуз девлетлуяр къачуз жеда
*****
Сарарни дустар гьа са яшда авайла кьери жез башламишда
*****
Гунагьар вири чна чилел ийизва, амма абур гьалалун цаваривай тIалабзава
*****
Хурудал гъед алайдал лишан кьаз регьят я
*****
Ни эквзава – гьам текзава…
*****
Цаварал гьахъ алалда. Цаварал гьахъ хьун мумкин я: Цаварал инсанар алач…
***** Кьакьанда авайбурни лакьандиз хуькведа
*****
Вилик рагъ квайдан кьулухъ серинни жеда
*****
Намус маса гуз жедач – къачудайбур авач
*****
Заз жуван уьмуьрда такунвайди анжах кьве затI я – бахтни кьиникь…
*****
Гьар са куьчеда агъа кIан са бегьем итимни са бегьем кицI хьун чарасуз я: итим – юкъуз мугьманар кьабулдайвал, кицI – йифиз душманрал элуькьдайвал…
*****
Гзафбуруз инсанар хьун патал бес тежезвайди анжах са затI я – инсанвал
*****
Михьи агъу михьи къизилдилайни къиметлу я
*****
Заз къе операцидиз тухузвай стхадин вилер акурдалай кьулухъ кьиникьдилай гзаф уьмуьрдихъай кич1е хьанва
*****
Заз вун хъуьтIуьз кIан хьана, вири гъуьлягъар чилик квайла
*****
Итимдин кьил тIазватIа, папан мезни тIа хьун герек я
****
Жувандалай чарабурун папар хъсан я: абуру къизилар къачун вавай ваъ, чарабурувай тIалабзава
*****
Мейит жедалди чувуд хьайитIани хъсан я
*****
Кьиникьин заланвал сур атIузвайбуруз ваъ, хур гатазвайбуруз хъсан чида
*****
Чи виридан уьмуьрар пуд гафуна гьакьзава – хана, хъвана, кьена…
*****
Бязибуру, кепек гайитIа, лечек алукIда
*****
(Чеченда мад дяве гатIуннава)
Урусатди вичин къуьруь къилинждиз Мад сеферда къилав гузва Къавкъаздал…
*****
Дуьньядал эхирдай амукьдайди тек са сергьят я – кьве вилин арадавай нер
*****
Чилик къизилар хьиз, гъуьлягъарни ква
*****
Кьилел къван аватайдаз, кIвачерик квай памбагди куьмекдач
*****
Зи яшар – зи рикIин яшар я
*****
Заз тIуьр фанни незмай фан тафават вуч ятIа хъсан чизва: тIуьр фу – тIуьна, незмайди – нез тахьунни мумкин я
*****
Акьван хьанвач зи яшар, Вун течир вахт хкудайтIа, За уьмуьрдай такьазвай…
*****
Чи девирда инсанар гьуьлерилай гзаф рюмкайра батмиш жезва
*****
(Зи бубадин сурал кхьинар)
Ви вил дуьньядихъ галамай, Чи вил – вахъ…
*****
Папаз яб тагузвайдини итим туш, Папа лагьайвал ийизвайдини
*****
-Алай аямдин лезги шаирррикай виридалай Касбуба Азизханов артух я. -Квелди? -Ада виридалай тIимил кхьизва…
*****
Ни лугьузва, мусурман папари хъвазвач. Мусурман папарини хъвазва – чпин итимрин иви…
*****
Зун дуьньядиз мад садрани хуькведач…
*****
Югъ-йифди зи гелева Зи рагьимсуз жаллатIар: Жез-жез тавур крарни Чиз-чиз авур гъалатIар…
*****
Елкадин пешер цацар тирвиляй хъуьтIуьзни къацуз амукьзава
*****
Папан тариф гьамиша тапан тариф я
*****
ТукIвадай малдихъ хъсан гелкъведа. Эгер вахъ гелкъвезватIа, вун тукIваз кIанзава
*****
Дишегьлидин рикIевайди бахтлу жеда, сивевайди – бахтсуз
*****
(Зарафат)
Чи Къавкъазда кIвализ атай Мугьман патал чанни гуда. ЗатI авачтIа кIвале недай, Хъуьтуьларна къванни гуда.
И дуьнья чаз мугьман ялда! Чун мугьманар ятIа нагагь, Кьабул куьздач бес са гьалда? Къавкъазви туш, заз чиз, Аллагь…
*****
Чун исятда физ хуьквезва сурариз, Гьар сеферда сад таз, къайгъу авачиз. Са вахт къведа – масабур физ хуькведа, Чакай са-сад галачиз…
*****
Сулеймана лагьана… Заз акур гуж кхьенва гьи къанунда, Вири уьмуьр фена хьи зи гишила: Ризкьи хьанач, сарар авай вахтунда, Сарар амач гила, ризкьи хьайила…
*****
Кьве чIал чизва заз жуваз – Лезги чIални урус чIал. Зи намусдиз чидайди Тек са чIал я – намус чIал.
*****
Гатфар къведа, Кьуд пата пеш ахъайда. Амма тек са вун чуплах яз амукьда, Зи бубадин сурун къван, Зи бубадин сурун къван…
*****
Пагь, чна уьмуьрда шумуд рехъ атIузва, Са гьиниз ят1ани геж жез чаз къурхузва. ДатIана катунар гьаваян азаб я - Чун вири рекьери сурариз тухузва…
*****
Гьар вун рик1ел хтайла, рикI цIразва. Чун гьикьван сих тиртIа, анай аквазва – Шумудни са йис ятIани къакъатиз, Къени чун чаз виридалай мукьвазва…
*****
Заказное стихотворение хуже заказного убийства
*****
Сколько мы любим, Столько мы – люди…
*****
КакацIар кIвачерин арада жеда. Нагагь кьамал алатIа, абур масадан какацIар я
*****
(Дустунин ктабдал кхьинар) Шумуд йис я вун шииррал алахъна, На абурай яцIу ктаб ацIурна. Чухсагъул, дуст, вуна къе чаз, шиирар ГьикI кхьена герек туштIа, къалурна.
*****
Зун гъвечIи халкьдин шаир я – заз гъвечIи шаир жедай ихтияр авач
*****
Уьмуьр, ни вуч лагьайтIани, хъсан затI я - анжах уьмуьрда чавай чи кIаниваал ислемишиз жезва
*****
Цаву чилиз язава Марфадин михер…
*****
ЧIехи СССР чукIурай Шеварнадзедивай къе са гъвечIи Грузия кIватIиз жезвач
*****
Инсанни тфенг хьиз я – хаз жезмай кьван ацIуризни жеда
*****
КIвахьначиртIа зулуз пешер, ХъуьтIуьз тарар кьурадай: Кужум тежез бескьадар яд Къаю кьунвай накьвадай.
Вири-вири ийидай за, Гьа пешер хьиз кьин патал – Пешери чеб къурбандзава, Диде тарар хуьн патал.
*****
(Мад сеферда дустарикай) Азиз тир дустар, куь полкуна Кас тахьун паталди зарулдай, Элкъуьрда за жув са пунктуниз, Югъ-йифди куь дердер кьабулдай.
Квевай гьич са затIни заз кIан туш, Гьалтайла – са чими салам я. Инсан хьиз акваз, зун инсан туш – Чан алай дуствилин храм я.
*****
Инсанни щётка хьтин затI я: вич михьи ятIа, вири михьда, кьацIанватIа – вири кьацIурда
*****
Шад тирла, за дуьньядин Кьилелай кап алтадна – Дуьшуьш хьана, къалгъанри Гъил ивидай ктадна: Пагь, зи гъилиз тIар хьана.
Тфу гана дуьньядин Пелез за, хъел акатна – ЦуькIуьн рекьин къвалав гвай Къизилгуьлдал аватна: Пагь, зи рикIиз тIар хьана…
*****
Грекрин чIехи писатель ва тарихчи Ксенофонтавай сада, «вун дуьньядал виридалай нел пехил я?» лагьана, хабар кьада.
-Эркек цицIерал,- куьруьди хьана адан жаваб
-Абурал куьз?
-Куьз лагьайтIа, диши цицIер лалбур я…
*****
Къуншидихъ галаз кIвал жезмай кьван мукьвал, рикI жезмай кьван яргъал хьун хъсан я
*****
Вун хьтин руш мад авач Ракъинин системада
*****
Вуж ядатIа патрумдавай гуьлледи, Виридалай хъсан чизва луьледиз…
*****
Маймунрикай хьайидалай инихъ инсанриз виридалай хъсандиз чир хьанвайди анжах са кар я: чпин айибарни ниятар чуьнуьхариз
*****
Инсандихъ акьван агъуна виже къвезвач: адан рикI бедендин чапла пата ава
*****
Муьгьуьббат Аллагьдин патав рехъ я
*****
Чаз дидейриз тIарвал гудай ихтияр анжах садра ава – чун хадайла
*****
Гьар атIай цуьк чна гатфарал ийизвай хер я
*****
Дишегьлийри гагь итимрин гъилерал балаяр гъида, гагь - кьилерал
*****
Гьар са дишегьлиди вич анжах пуд макъамда халисандиз бахтлу яз гьиссзава: гъил -киседал, кьам - хуьцуьгандал,сив масадан япал алайла
*****
КIанибурун вилериз мукьвал-мукьвал килиг…
*****
Са чувуд шаирди лагьана…
Дуьньядал алай кьван инсанар вири чувудар я, амма тIимилбуру а кар хиве кьазва, гзафбуру – ваъ.
*****
Дуьньядин винел виридалай бахтсуз затIар цеквер я: чпин гъвечIивал гьисабда кьурла, абурухъ виридалай чIехи душманар ава – север.
*****
Нагагь бирдан акуртIа зи сурун къван, Акъваз, лезги, ая руьгьдихъ зикирар: Михьи инсан тушир жеди зун акьван, Амма, агъугъ, михьи тир зи фикирар…
*****
Югъ перемар хтIуннавай йиф я
*****
Заз бахт – цIипуд лагьай варз я йисан
*****
Са дишегьли женнет я, кьве дишегьли – жегьнем
*****
Шиир акI кхьена кIанда хьи, герек ам кIелиз алдатмишарна, чIехи итимарни суьннет ийиз жен
*****
Нагагь Диоген чи девирда челегда яшамиш жез алахънайтIа, ам, челегдин кьилни гьалд хъувуна, са гуьнедай агъуз авадардай.
Чи девирда челегда авайбуруз арифдарар ваъ, селедкаяр лугьузва.
*****
Зи хурални алкIурнава къизилдин гъед – къене патай.
*****
Гьакьван сеферриз агакьзавай кьве кIвачни, гьакьван крар алакьзавай кьве гъилни вичиз шартIсуз муьтIуьгъарнавай кьиливай бязи вахтара гьакIан лагълагъзавай са гъвечIи якIун тикедин – мецин иесивал жезвач.
*****
Начагъзавай езнеди вичел кьил чIугваз атанвай ирандидедива й тIалабда: -Ваз минет хьуй, ирандиде, жуван тфу яна зи далуяр тIушуна ман. -Тфу яна далуяр тIушундани? -Заз духтурри агъудай тIушунайла ачух жеда лагьанва...
*****
Йиф мусурман дишегьли я
| |
